Гісторыі і 10 гадоў Telegram

Чытаць арыгінальны допіс па-англійску

Сёння Telegram святкуе свой дзясяты дзень нараджэння – і выпускае пакуль што найбольшае абнаўленне з усіх. За дзесяць гадоў мы дадалі ў праграму сотні новых магчымасцей, якімі цяпер карыстаюцца больш за 800 мільёнаў людзей. У гэтым абнаўленні мы запускаем гісторыі – з унікальным рэжымам падвоенай камеры, найдакладнейшымі наладамі прыватнасці, гнуткімі наладамі працягласці і шмат чым яшчэ.

Гісторыі Telegram

Гісторыі дазваляюць хутка перадаць момант з вашага жыцця і даведацца больш аб жыцці вашых сяброў – і цяпер яны даступныя ў Telegram.

Гэта была адна з тых рэчаў, якую нас часцей за ўсё прасілі зрабіць, за ўсю гісторыю прапаноў для Telegram – і мы некалькі месяцаў працавалі над тым, каб зрабіць гэты фармат інавацыйным і гнуткім. Гісторыі Telegram маюць усё, чаго вы ад іх чакаеце, і значна больш за тое таго, чаго яшчэ ніхто ніколі не рабіў.

Гісторыі паказваюцца ў спецыяльнай расцягваемай панэлі уверсе вашага экрана – так што вы ўсё яшчэ будзеце бачыць спіс вашых чатаў і папак у поўную даўжыню.

Падчас прагляду гісторыі вы можаце хутка абагуліць яе, адказаць аўтару асабіста, або пакінуць рэакцыю – націсніце, каб хутка пакінуць , або ўтрымлівайце, каб выбраць больш рэакцыі або карыстальніцкі эмодзі.

Прадвызначана вы бачыце гісторыі ад усіх вашых кантактаў на галоўнай старонцы – і вы можаце схаваць гісторыі ад пэўных кантактаў, калі перанясеце іх у свой архіў чатаў.

Падвоеная камера

Каб захапіць увесь абшар вашай гістарычнай падзеі, вы можаце весці запіс на пярэднюю і заднюю камеры вашай прылады адначасова – і вы можаце выбраць, куды накіруецца відэа з кожнай камеры, нават падчас запісу.

Стыкеры, месцазнаходжанні і подпісы

У гісторыях даступны магутны рэдактар медыя Telegram – што дазваляе вам дадаваць тэкст, малюнкі, стыкеры і пазначаць месцазнаходжанне. А калі вы хочаце растлумачыць пра тое, што адбываецца ў гісторыі, яшчэ падрабязней, то можаце дадаць подпіс – дзе можна адзначаць сяброў, пакідаць спасылкі або проста зрабіць доўгае тэкставае апісанне.

Вы можаце дадаць відарысы са сваёй галерэі – або скарыстацца пошукам, каб знайсці анімацыі і відарысы ў інтэрнэце.

Дакладныя налады прыватнасці

Размяшчаючы гісторыю, вы можаце выбраць адну з 4 налад прыватнасці: Усе, Мае кантакты, Блізкія сябры і Выбраныя кантакты. Кожная налада можа быць поўнасцю наладжана, што дазволіць вам уключаць або выключаць любых карыстальнікаў.

Можаце таксама вызначыць спіс тых карыстальнікаў, каму ніколі не будзе дазволена бачыць вашы гісторыі – каб ваша начальніца або бабуля не даведаліся аб вашых прыгодах.

Для яшчэ большай прыватнасці вы можаце забараніць здымкі экрана, каб тыя, хто праглядае вашы гісторыі, не маглі іх захоўваць або абагульваць.

Гісторыі ў профілі

Гісторыі могуць быць даступнымі па вашым выбары на працягу 6, 12, 24 або 48 гадзін. Вы таксама можаце размясціць іх у ваш профіль, і яны будуць уладкаваны ў шыкоўную сетку — каб любыя карыстальнікі, і тыя, якія даўно ў вашым спісе кантактаў, і тыя, з кім вы толькі пазнаёміліся, маглі бачыць выбраныя вамі моманты так доўга, як вам спатрэбіцца.

Цяпер, калі вы пазнаёміцеся з чалавекам праз Telegram, вы зможаце ўбачыць не толькі некалькі аватараў, але і яркія, захапляльныя моманты жыцця.

У кожнай размешчанай вамі гісторыі будуць асобныя налады прыватнасці – так што вы заўсёды зможаце вызначыць, якія з іх пэўныя карыстальнікі змогуць або не змогуць праглядаць.

Рэдагаванне гісторый

Telegram становіцца першай сацыяльнай сеткай у свеце, у якой вы можаце змяніць любы элемент у гісторыі ў любы момант – яе даступнасць для іншых, подпіс, стыкеры ці іншыя дастасаванні – без неабходнасці кожны раз выдаляць і размяшчаць яе нанава.

Каб адрэдагаваць гісторыю, адкрыйце яе з той прылады, з якой вы яе размясцілі, і націсніце або > Рэд. гісторыю.

Падрабязная статыстыка

Калі нехта адкрые вашу гісторыю, то трапіць у спіс тых, хто яе праглядзеў, бачны толькі вам – нешта накшталт пазнакі аб прачытанні.

Пасля таго, як вы размясцілі гісторыю, вы можаце адкрыць яе і ўбачыць спіс праглядаў – які можна адфільтраваць, каб убачыць, напрыклад, толькі вашы кантакты, ці адсартаваць так, каб зверху былі нядаўнія прагляды або спярша рэакцыі. А калі хочаце праверыць, ці бачыў яе пэўны карыстальнік, проста ўвядзіце яго імя ў поле пошуку.

Для пашыранай ананімнасці карыстальнікі Premium могуць уключыць рэжым нябачнасці – гэта выдаліць іх са спісу праглядаў усіх гісторый, якія былі прагледжаны імі за апошнія 5 хвілін, а таксама выключыць іх са спісу праглядаў тых гісторый, якія яны будуць глядзець на працягу наступных 25 хвілін.

…і шмат чаго яшчэ

Каб даведацца аб усіх магчымасцях гісторый, якія не ўмясціліся ў гэты артыкул, запрашаем да чытання нашага падрабязнага дапаможніка па гісторыях Telegram.

Дзякуем вам за гэтыя 10 цудоўных гадоў. Калі хочаце працягнуць святкаванне, то можаце пачытаць, што заснавальнік Telegram думае з гэтай нагоды