Эмодзі-аватары, катэгорыі эмодзі, пераклад чатаў цалкам і шмат чаго яшчэ

Чытаць арыгінальны допіс па-англійску

Стварэнне аватараў, катэгорыі эмодзі, пераклад чатаў цалкам і шмат чаго яшчэ

Першае за год абнаўленне Telegram дадае 10 значных новых магчымасцей — мы падумалі, што добра будзе для пачатку крыху размяцца.

Эмодзі-аватары

Вы можаце хутка зрабіць любы стыкер або анімаваны эмодзі аватарам любога з вашых уліковых запісаў, суполак або каналаў. Таксама, кожны можа дастасоўваць анімаваныя і карыстальніцкія эмодзі як аватары, нават не маючы падпіскі на Telegram Premium.

Нагадаем, што вы можаце прызначыць або прапанаваць аватар любому з вашых кантактаў – паспрабуйце адрэдагаваць звесткі аб кантакце праз Telegram.

Катэгорыі эмодзі

Стыкеры і эмодзі цяпер згрупаваны паводле катэгорый, напрыклад, або – у адпаведнай панэлі і падчас выбару рэакцыі або статусаў. Утрымлівайце эмодзі, каб прыблізіць яго і лепей разгледзець, перш чым адпраўляць.

Карыстальнікі Telegram могуць адправіць больш за мільён разнастайных стыкераў і эмодзі, але мы не хочам, каб на выбар таго самага трэба было выдаткоўваць тры працоўных дні.

Пераклад чатаў цалкам

Падпісчыкі Premium цяпер могуць перакладаць цэлыя чаты, суполкі і каналы амаль без затрымак, націснуўшы на панэль перакладу уверсе. Налады дазволяць вам схаваць панэль і выбраць, якія мовы будуць перакладацца.

Усе карыстальнікі могуць перакладаць асобныя паведамленні, выбіраючы іх і націскаючы «Перакласці».

Выкарыстанне сеткі

Вы можаце ўбачыць, які аб'ём даных выкарыстаў Telegram, з дапамогай падрабязных кругавых дыяграм для Wi-Fi і мабільнай сеткі – і наладзіць аўта-спампоўванне, каб падстроіцца пад свой тарыф.

Выкарыстанне сховішча мінулым месяцам атрымала такое ж абнаўленне. Бадай, нам так хутка няма чаго будзе перарабіць на кругавую дыяграму – і так усё ўжо перарабілі…

Аўтазахаванне атрыманых медыя

Вы можаце наладзіць аўтаматычнае захаванне атрыманых медыяфайлаў у галерэю, у залежнасці ад памераў, тыпу і чату, у якім вы атрымалі файл. Гэтае меню таксама падтрымлівае выключэнні, так што вы дакладна зможаце захаваць менавіта тое, што хочаце.

З Telegram вы не маеце патрэбы захоўваць усё на сваёй прыладзе. Медыя і дакументы можна выдаліць са сховішча прылады і спампаваць нанова з воблака Telegram у любы момант.

Дакладныя налады дазволаў медыя

Кіраўнікі могуць выбраць, які з 9 асобных тыпаў медыя можна адпраўляць удзельнікам суполкі – напрыклад, фота або галасавыя і відэапаведамленні. Таксама можна адключыць тэкставыя паведамленні і стварыць суполкі толькі для медыя.

Нарэшце, цяпер можна стасавацца толькі галасавымі або віктарынамі, і ніякі кіраўнік вам не забароніць.

Гадавая падпіска на Premium

Вы можаце захаваць да 40% на падпісцы на Telegram Premium, калі адразу аплаціце цэлы год эксклюзіўных магчымасцей.

А цяпер, маючы цэлы год Premium наперадзе, чаму б не падарыць пару месяцаў гэтага цуду і сваім сябрам?

Выбар чатаў для ботаў

Распрацоўшчыкі ботаў цяпер могуць дадаваць спецыяльныя кнопкі, праз якія карыстальнікі змогуць выбраць суполкі, каналы або кантакты па загадзя вызначаных крытэрыях.

Напрыклад, можна хутка дадаць бота ў суполку, якой карыстальнік кіруе і ў якой уключаны тэмы абмеркавання.

Распрацоўшчыкі ботаў могуць даведацца пра гэту магчымасць больш падрабязна ў дапаможніку і на канале @BotNews.

Паўторны ўваход праз Apple і Google ID

Карыстальнікі, якія выйшлі з уліковага запісу, могуць хутка ўвайсці зноў праз Apple або Google ID, не ўводзячы коду з SMS. Калі ў вас прызначаны пароль двухэтапнай праверкі, то вам усё яшчэ трэба будзе яго ўвесці.

Новыя дадатковыя эмодзі

Ніводнае абнаўленне – не абнаўленне без 10 новых набораў дадатковых эмодзі ад мастакоў Telegram. Гэтым разам мы дадалі некалькі соцень іконак, зробленых спецыяльна для аватараў профілю і суполак.

Вы можаце прагледзець і дадаць любы з гэтых набораў проста зараз — праз новы раздзел «Папулярныя эмодзі» уверсе вашай панэлі эмодзі.

Новыя інтэрактыўныя эмодзі

Нашы аніматары зрабілі інтэрактыўныя версіі для . Адпраўце любы з іх у асабістым чаце, а пасля націсніце яго, каб убачыць поўнаэкранны эфект, сінхранізаваны для вас і суразмоўцы. Таксама ўсе карыстальнікі могуць цяпер рэагаваць гэтымі эмодзі.